［騎師王］李嘉誠好有眼光，哦。咁你呢？

TLDR：李嘉誠好有眼光。但長實過去3...

［騎師王］李嘉誠好有眼光，哦。咁你呢？

TLDR：李嘉誠好有眼光。但長實過去3年就跌足3年，仲要每年都跑輸大市（仲要只係恒指，唔好同美股比）。而家股價甚至低過2015年世紀重組時。以前唔係咁的，something is wrong

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

1. 都唔少人PM問我呢壇嘢，咁，話定你知，梗係今晚Patreon先寫啦。付費讀者優先。都係嗰句，一舊水唔使，仲可以睇返晒以前嘅文，覺得垃圾嘅，咪月尾cut咗佢咯。誰阻你？

2. 不過，都仲有少少嘢講嘅。我見出面啲講法—不，都唔使見。估都估到出面啲港法，又係李嘉誠高招，噢。無寶不落，噢。今日先知？

3. 但，咁你買咗長實未？長和呢？長江基建呢？點解未買？

4. 我 Patreon第一篇文，就係寫In KS We Trust，你話重唔重要？就剛好當時（舊年8月）出完中期業績，減咗派息，股價大跌，已經叫買。仲有，之後你睇到，一出完業績嗰日，就嗰一日，佢地已經不停咁增持。咁你話呢？仲唔明顯？

5. 張圖，係我文章寫過In KS We Trust嘅次數，廿年前嗰啲唔好計，只計有收費專欄開始。你見，真係由HomeBlogger 舊年3月嘅「事先張揚」，寫到去開Patreon，只係8月我都寫咗5次，未計我冇用呢句嘢嘅文。

6. 問題係，嗰時你又唔買？大把機會畀你慢慢儲。

7. 所以都係好老套嗰句，Jeff Bezos問畢菲特，你啲嘢，聽落咁易，做乜咁少人做到？因為 Nobody wants to get rich slowly:嘛。

8. 畀你知李嘉誠神機妙算乜乜乜，又點？你會跟咩？

9. 畀啲冰冷嘅數字你，今年長實升咗18%，相當不錯啦，跑贏晒大市。但，係呢浸啲新經濟股（其實係發夢股）香晒你先覺得兩個幾月升18%幾好啫。換著早兩個月？推蘋果Facebook都畀人話升得慢啦，兩個月升18%？我啲嘢一日都兩成啦，做option唔止添。你有幾可見長實啲股價會有人講？

10. 今年幾好，但往年呢？2020年，56蚊跌到 40蚊，跌30%。2019年呢？好少少，57蚊跌落56蚊，只係輸2%—但嗰年恒指升咗9%，兩千幾點，而家幾百點啲人都話股災。2018年呢？68蚊跌落 57蚊，又輸16%。

11. 即係點？即係，買長實，之前3年，每年都輸錢，仲要每年都跑輸大市。而家股價，都未及2015大龍鳳嗰時。

12. 51蚊回購？多撚謝喎。但你知唔知，2015/2016嗰時已經係咁嘅價？2015年世紀大龍鳳長實和黃重組嗰時，75蚊呀！

13. 當然我啲Patreon讀者唔會問侯我，亦相信跟住佢搵食應該OK，佢都增持你怕乜。但，事實係股價真係唔係十分好。同世紀大龍鳳之前同股東一齊富貴，股價45度咁上，就真係唔係同一回事了。

14. 點解會咁？唔知喎，等高人作答。可能環境唔同咗，可能真係世界變咗（但，巴郡股價早排先新高！）。但，不停講李嘉誠點巴閉點好嘢點有眼光，點解股東呢幾年跟住佢，就同以前咁唔同呢（強調返，以前就真係同你共富貴）？

15. 你地會講，李嘉誠買Zoom，一早睇好新經濟，好有眼光。都係嘅，固然多得佢身邊嘅人勁，但梗係咁架啦，唔通佢自己去砌model？（楷仔就仲會嘅），問題係，Zoom嘅股份，在邊？咁好嘅嘢，點解唔益下股東呢可？哦，冇仙甩治，咁你可以睇下長和啲其他業務，又係咪好有仙甩治？

16. 費事有人扭曲，再講一次。好長好長嘅日子，李嘉誠真係教科書典範，海盜船出海，大家就出錢，共同進退，共患難同富貴，做到咁嘅香港公司，極之極之咁少（美國反而多），水鳩小股東嘅就大把。至於你做佢對家（例如胡仙），或者做佢客仔（鑽石廳住過未？仲有廢柴3台，垃撚圾嘅豐澤，同埋賣漁魚嘅百佳），就梗係唔太好玩。但佢對員工好，對股東亦都好。

17. 不過近年呢，就真係唔知點解，唔係好一樣了。當然唔代表佢有心要佔你便宜（大佬，照下鏡先啦，人地使唔使呃你啲錢？係咪又要講我嘅打邊爐故事？）。又或者，臨尾（大吉利是，但大家明啦）先整舖代表作，幫股東再發一次財，也說不定嘅—過去幾年畢菲特都畀人恥撚笑啦，巴郡都唔掂啦，但而家一樣創到新高。

18. 但問題係，好多人買股票？聽日跌3%就問乜事，5%就股災，10%就打靶止蝕啦。

19. 咁你可以睇多次，長實嘅股價圖係點嘅，睇多次第10段。咁再重覆一次，過去3年，長實都係跌嘅，仲要3年都跑輸大市，而家股價仲低過2015世紀大龍鳳嗰時。咁你可以睇下騰訊 或者 港交所 2015年時幾錢。咁你講無價不落勁最勁嘛，當然拎啲好嘅股票嚟比啦。

20. 講到尾，乜嘢財技乜嘢眼光都假。上市公司只睇一樣嘢，股價。如果股價唔得，但出面係咁話啲財技好得眼光好得，係咪即係「手術成功 病人死亡」？係咪出咗啲問題呢？上市公司唔講股價，講乜？哦，你好有眼光。你好有眼光關我撚事？

21. 至於今次公告呢堆嘢？都話Patreon寫。但免費嘢我都醒2000字畀你，算係咁啦

22. 另外，私人恩怨，而家失業，最大不便係冇Bloomberg用。咁我未致於癲到自己屋企裝部嘅。兩皮嘢喎，「唔係裝唔起但唔值」「即係裝唔起」。但，有冇巴打有介紹？都真係要pro啲嘅，但唔使即時報價（本人唔炒股票）。即係，平價版Bloomberg咯。FactSet如何？或者Eikon 又幾銀（聽聞家用簡約版有得平一截？）。

＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折

---